குழந்தையை முட்புதருக்குள் தூக்கிப்போட்ட பெற்றோர்!

 முட்புதருக்குள் கைவிடப்பட்ட நிலையில் பச்சிளம் குழந்தை ஒன்றை வழிபோக்கர் ஒருவர் கண்டு மீட்டுள்ள சம்பவம் அதிர்ச்சியை ஏற்படுத்தியுள்ளது.

இந்தியாவின் குஜராத் மாநிலத்தின் உனா பகுதியில் குறித்த சம்பவம் நடந்துள்ளது.

முட்புதருக்குள் பெண் குழந்தை ஒன்று பழந்துணியால் சுற்றப்பட்டு கிடந்த நிலையில் அப்பகுதியில் சென்ற வழிப்போக்கர் ஒருவர் குழந்தையின் அழுகுரல் கேட்டு குழந்தையை மீட்டுள்ளார்.

 முட்புதருக்குள் குழந்தை இருந்ததால், குழந்தையின் உடம்பில் முட்கள் கீறி ரத்தம் வழிந்து காணப்பட்டதாக தெரிவிக்கப்படுகிறது.

அந்த குழந்தையை அதன் பெற்றோர் இறக்க வேண்டும் என்றே கைவிட்டிருக்கலாம் என அஞ்சப்படுகிறது.

குழந்தையை மீட்ட அந்த நபர் உடனடியாக அருகாமையில் உள்ள மருத்துவமனைக்கு தொடர்பு கொண்டு நடந்தவற்றை எடுத்துக் கூறியுள்ளார்.

இதனையடுத்து விரைந்து வந்த அவசர சிகிச்சைப்பிரிவினர் குழந்தையை மீட்டு மருத்துவமனைக்கு எடுத்துச் சென்றுள்ளனர்.

இந்த நிலையில் குழந்தையை முட்புதருக்குள் வீசிச் சென்ற அதன் பெற்றோரை பொலிசார் தேடி வருகின்றனர்.

இந்தியாவிலிருந்து இலங்கை திரும்பும் அகதிகளுக்காக கப்பல் சேவை!!

இலங்கைக்கும் இந்தியாவிற்கும் இடையில் மீண்டும் கப்பல் சேவையை ஆரம்பிப்பதற்கு தமிழ்நாடு அரசு முயற்சிப்பதாக தெரிவிக்கப்படுகிறது.

இதேவேளை கொழும்பு – தூத்துக்குடிக்கு இடையில் இருந்து வந்த கப்பல் சேவையானது ஆறு ஆண்டுகளுக்கு முன்னர் இடைநிறுத்தப்பட்டிருந்தது.

இந்த நிலையில் மீண்டும் குறித்த கப்பல் சேவையை ஆரம்பிப்பதற்கு நடவடிக்கைகள் முன்னெடுக்கப்பட்டுள்ளன.

இந்தியாவில் உள்ள இலங்கைத் தமிழ் அகதிகள் நாடு திரும்ப வேண்டுமாயின் அவர்களுக்கு வசதியாகவே இந்த நடவடிக்கைகளை முன்னெடுக்கவுள்ளதாக இந்திய அரசின் மூத்த அதிகாரி ஒருவர் தெரிவித்துள்ளார்.

இந்தியாவிலிருந்து நாடு திரும்பும் இலங்கை அகதிகளின் எண்ணிக்கை அதிகரித்த வண்ணம் உள்ளதாகவும் ஊடகம் ஒன்று செய்தி வெளியிட்டுள்ளது.

காணிகளை வாங்கி குவிக்க மகிந்தவின் குடும்பத்திற்கு பணம் எங்கிருந்து வந்தது..?

முன்னாள் ஜனாதிபதி மஹிந்த ராஜபக்‌ஷவின் மனைவி ஷிரந்தி ராஜபக்‌ஷ மற்றும் அவரது மகன்மார்களான நாமல், யோசித ஆகியோரின் பெயரில் நாடு முழுவதும் 21 காணிகள் இருப்பதாக மக்கள் விடுதலை முன்னணியின் தலைவர் அநுரகுமார திசாநாயக்க தெரெிவித்தார்.

இதுதொடர்பில் சரியான தகவல்கள் தம்மிடம் இருப்பதாகவும் அவர் தெரிவித்தார்.

இரத்தினபுரி மாவட்டத்தில் இன்று (புதன்கிழமை) நடைபெற்ற பொதுகூட்டமொன்றில் கலந்துக்கொண்டு உரையாற்றும் போதே அவர் இவ்வாறு தெரிவித்தார்.

அவர் மேலும் கருத்து தெரிவிக்கையில்,

அவர்களினால் வாங்கப்பட்ட காணி உறுதிப்பத்திரங்களின் இலக்கங்கள், வாங்கப்பட்ட திகதி, பணம் கொடுத்தமை தொடர்பான சரியான தகவல்கள் தம்மிடம் இருப்பதாக அவர் தெரிவித்தார்.

எனவே இவ்வாறு விசாலமான காணிகளை வாங்குவதற்கு மஹிந்த குடும்பத்தினருக்கு எங்கிருந்து பணம் கிடைத்தது என்று அவர் கேள்வி எழுப்பினார்.

பிக்பாஸ் ஓவியாவிற்கு இலங்கை ரசிகர்கள் வெளியிட்ட பாடல்

உலகில் பிரபல தொலைக்காட்சி நிகழ்ச்சியான பிக்பாஸ் நிகழ்ச்சி தற்போது இந்தியாவில் தமிழ் தொலைக்காட்சியான விஜய் டிவி ஒளிபரப்பி வருகின்றது.

குறித்த நிகழ்ச்சி பங்குக்கொண்டு உலக மக்கள் அனைவரின் வரவேற்பினை வெற்ற ஓவியாவிற்கு இலங்கையினை சேர்ந்த கலைஞர்கள் இணைந்து பாடல் ஒன்றினை வெளியிட்டுள்ளனர்.

பிரேம் ராஜ் இசையமைப்பில் வெளிவந்துள்ள குறித்த பாடலில் யஜீவன்,பிரசாதன் மற்றும் பிரேம்ராஜ் பாடியுள்ள அதேவேளையில் ரமேஸ்காந் மற்றும் எஸ்.ஜி.பிரபு சொல்லிசை பாடியுள்ளனர். 

மேலும் குறித்த பாடலின் வரிகள் பிரவீன் மற்றும் பிரேம் ராஜ் எழுதியுள்ளதோடு, பிரவீனின் ஒளிப்பதிவு மற்றும் கஜனின் வடிவமைப்பில் காணொளி பாடலாக வெளியாகிள்ளது.

இப்பாடல் மக்கள் மத்தியில் பிரபலமாக பேசப்பட்டுவருகின்றமை குறிப்பிடத்தக்கது.

பவுன்சர் பந்து தாக்கி பாகிஸ்தான் கிரிக்கெட் வீரர் மரணம்

பாகிஸ்தானின் உள்ளூர் கிரிக்கெட் தொடர் ஒன்றில் பேட்டிங் செய்துகொண்டிருந்த ஜுபைர் அகமது என்ற வீரர், பவுன்சர் பந்து தலையில் தாக்கியதில் உயிரிழந்தார். 

கைபர் பதுன்க்வா மாகாணத்தின் மர்தான் மாவட்டத்தைச் சேர்ந்த ஜுபைர் அகமது, பாகிஸ்தான் அணியின் முன்னணி வீரரான பஹர் ஜமனின் கிரிக்கெட் அகாடமியைச் சேர்ந்தவர். கிளப் அணிகள் இடையிலான போட்டியின்போது ஹெல்மெட் அணியாமல் வேகப்பந்து வீச்சை எதிர்கொண்டதால், அவர் உயிரிழக்க நேரிட்டதாகத் தெரிகிறது. இந்த சம்பவம் குறித்து ட்விட்டரில் பதிவுசெய்துள்ள பாகிஸ்தான் கிரிக்கெட் வாரியம், கிரிக்கெட் விளையாட்டின்போது பாதுகாப்பு அம்சங்களைக் கடைபிடிக்க வேண்டிய அவசியத்தை நினைவுபடுத்தி இருப்பதாகவும், ஜுபைரின் குடும்பத்தினருக்கு ஆழ்ந்த இரங்கல் தெரிவித்துக்கொள்வதாகவும் தெரிவிக்கப்பட்டுள்ளது. முன்னணி கிரிக்கெட் வர்ணணையாளரும், முன்னாள் கிரிக்கெட் வீரருமான டீன் ஜோன்ஸ், தனது இரங்கலைத் தெரிவித்துள்ளார். ஆஸ்திரேலிய அணியினரின் பயிற்சிப் போட்டியின்போது இதேபோல பவுன்சர் பந்து தாக்கியதில் துணைக் கேப்டன் டேவிட் வார்னர் காயமடைந்தது குறிப்பிடத்தக்கது. நேற்று நடந்த அந்த போட்டியின் போது காயமடைந்த வார்னர், உடனடியாக மைதானத்தை விட்டு வெளியேறினார்.

சிங்களம் வாசிக்கத் தெரியாது?- கூறியது மகிந்தவின் மனைவி!

முன்னாள் ஜனாதிபதி மஹிந்தவின் மனைவி ஷிரந்தி ராஜபக்ஷ நேற்று குற்றப் புலனாய்வுப் பிரிவினரால் விசாரணை செய்யப்பட்டார்.

இதன்போது  விசாரணை அறைக்குள் ஷிரந்தியுடன் உடன் சென்ற மஹிந்த, சட்டத்தரணி ஜயந்த, தொலவத்த உளிட்ட எவரும் அனுமதிக்கப்படவில்லை.

இந்நிலையில் விசாரணையின் பின் வாக்கு மூலத்தை பதிவு செய்த பொலிஸார் அதனை படித்துப் பார்த்து கையொப்பமிட ஷிரந்தியிடம் கோரியுள்ளனர்.

இதன் போது தனக்கு சிங்களம் வாசிக்கத் தெரியாது என ஷிரந்தி கூறியுள்ளதாக தெரியவருகின்றது.

பதுளையில் பிறந்த ஷிரந்தி சிங்களத்தை திடீரென மறந்தமை முழு குற்றப் புலனாய்வுப் பிரிவினருக்கு ஆச்சரியத்தை உண்டுபண்ணியது .

எனினும் சிங்களம் தெரியாது என ஷிரந்தி கூறியதை தொடர்ந்து விசாரணை அறைக்கு வெளியில் இருந்த சட்டத்தரணி ஜயந்த வீரசிங்கவை அழைத்த புலனாய்வுப் பிரிவு அவர் ஊடாக வாக்கு மூலத்தை வாசித்துக் காட்டியுள்ளது.

எனினும் சட்டத்தரணி கோரும் திருத்தங்களுக்கு அங்கு வாய்ப்பில்லாமல் போயுள்ளது.

ஏனெனில் விசாரணை முழுதையும் புலனயவுப் பிரிவு ஒலி பதிவு செய்துள்ளதால் ஷிரந்தி தரப்புக்கு ஏற்றாப் போல் வாக்கு மூலத்தை மாற்றிக்கொள்ள முடியாமல் போகவே, சி.ஐ.டி. பதிவு செய்த வாக்கு மூலத்தில் கையொப்பமிட்டு திரும்பியுள்ளதாக தெரியவருகின்றது.

யாழில் அசாதாரண நிலையை உருவாக்குவது யார்.?

போரிற்கு பின்னர் அமைதியான ஒரு வாழ்க்கையை வாழலாம் என்று எண்ணும் மக்கள் மனதில் மீண்டும் ஒரு குழப்பநிலை உருவாகியுள்ளது.

சமீப காலமாகவே யாழில் ஒருவித பதற்ற நிலை காணப்படுகிறது. போர் காலத்தில் நடமாடியதைப்போன்று படையினரின் நடமாட்டங்கள் அதிகரித்துள்ளது.

வாள்வெட்டு சம்பவங்கள், பொலிசார் மீதான வாள்வெட்டு, அதிரடி சோதனைகள், திடீர் சுற்றிவளைப்பு, திடீர் துப்பாக்கிப் பிரயோகம் என்று பதற்றமான ஒரு சூழலை யாழ்.குடாநாடு பூசிக்கொண்டுள்ளது.

இந்த  நடவடிக்கைகள் மக்களைக் கிலி கொள்ளவைத்துள்ளது.

இந்தநிலையில் வடக்கின் பதற்ற நிலைக்கு முன்னாள் போராளிகள் காரணம் என்ற குற்றச்சாட்டு முன்வைக்கப்பட்டது.

பின்னர் இராணுவத்தளபதி அதனை மறுத்திருந்தார். இதுவொருபுறம் இருக்க, தொடர்ச்சியான இந்த அசாதாரண நிலைக்கு ஆவா குழுவினரே காரணம் என்ற கூறப்படுகிறது.

ஆக இவ்வாறான ஒரு நிலையை தோன்றவில்லை..மாறாக தோற்றுவிக்கப்படுகிறது என்பதே நிதர்சனம்.

தொடர்ச்சியாக இடம்பெறும் சம்பவங்களை கட்டுக்குள் கொண்டுவராமல் அரசு வேடிக்கை பார்க்கிறது. இதற்கு பின்புலம் இன்றி ஒவ்வொரு விடயங்களையும் நகர்த்த முடியுமா என்பது மக்கள் மனதில் எழும் கேள்விகளே..

தொடர்ச்சியான அசாதாரண நிலையினால் இளைஞர்கள் கைது செய்யப்படுவதால் மீண்டும் இளைஞர்களின் பாதையை வேறு திசைக்கு நகர்த்த முற்படுகிறார்களா?

சமூக விரோதிகளை இனங்கண்டு அழித்தொழிக்க வேண்டிய கடப்பாடு அரசிற்கு இருக்கிறது.

அதனை செய்யாது மெத்தனப் போக்கை அரசு கடைப்பிடிக்குமேயானால் மீண்டும் மக்களின் வாழ்க்கை பெரிதும் பாதிப்புக்களுக்கு உள்ளாவதோடு, படையினருக்கும் சவாலாகவே அமைந்துவிடும்.

இவ்வாறான சம்வங்களைத் தொடர்ந்து படையினரின் அதிகரிப்பு என்பது குடாவில் அதிகரித்துள்ளது..

இராணுவப் பிரசன்னம் குறைக்கப்பட வேண்டும் என மூச்சுக்கு முன்னூறு தடவை கொக்கரித்துக் கொண்டு இருந்தவர்கள் இப்போது இருந்த இடம் தெரியாமல், வாய்மூடி இருக்கின்றனர்.

ஆக எல்லாமே அரசியல் நோக்கத்தை அடிப்படையாக கொண்டு தான் செயற்படுகிறார்களே தவிர தமிழ் மக்கள் மீது கரிசனை இல்லயோ என்று எண்ணத்தோன்றுகிறது.

இதற்கிடையே ஆவா குழு உறுப்பினர்களுக்கு வெளிநாட்டில் இருந்து பணம் மற்றும் உதவிகளை வழங்கும் ஜேர்மன் நாட்டை சேர்ந்த ஒருவர் அடையாளம் காணப்பட்டிருக்கின்றார். மேலும் விசாரணைகள் தீ விரமாக நடைபெற்று கொண்டிருக்கின்றது.

ஆவா குழுவுக்கு வெளிநாட்டில் இருந்து பணம் வழங்குதல் உள்ளிட்ட பல உதவிகளை செய்வோர் தொடர்பாக இன்டர்போல் உதவியை கேட்க இருப்பதாக பொலிசார் கூறியதாக வடக்கு முதல்வர் கூறியுள்ளார்.

இவ்வாறு சாலையோரம் முளைக்கும் திடீர் செடிகள் போல் நாளுக்கு நாள் புதுப்புது செய்திகள் வெளியாவதால், நாளை என்ன நடக்குமோ என்று கேள்விகள் மட்டுமே எழுகிறது.

அதாவது தமிழ் மக்களை ஆயுதங்களின் நிழலில் வைத்திருக்க வேண்டுமென்று அடிமனதில் வைத்திருக்கும் தந்திரோபாயத்தை கையாள நினைக்கிறது தென்னிலங்கை..

அரசின் தந்திரோபாயங்களை நிறைவேற்றும் விதமாகவே அண்மைக்கால சம்பவங்கள் எடுத்துரைக்கிறது.

ஆக தென்னிலங்கை நினைப்பதை நடைமுறைப்படுத்துவதற்கு ஏதுவாக யாழ் குடாநாட்டின் நிலை அமைகிறது.

இதுவொருபுறம் இருக்க  வட மாகாண சபையின் முறுகல் நிலைமையானது நீறு பூத்த நெறுப்பாகவே உள்ளது.

மொத்தத்தில் தமிழ் மக்களின் நிம்மதியை கெடுக்கும் வகையிலேயே செயற்பாடுகள் அமைகிறது.

யாழில் அசாதாரண நிலையை உருவாக்குவது யார்..? அல்லது எதற்காக உருவாக்கப்படுகிறது என்ற உண்மையைக் கண்டறிந்து தகுந்த நடவடிக்கைகள் முன்னெடுக்கப்பட வேண்டும்.

இல்லையெனில் மீண்டும் தமிழ் மக்கள் இன்னல்களை எதிர்கொள்ள வேண்டிய துர்பாக்கிய நிலைக்கு தள்ளப்படுவர் என்பதில் எவ்வித ஐயப்பாடும் இல்லை.

ஷிரந்தி ராஜபக்‌ஷவின் வாகனம் இரண்டு முறை நிறம் மாற்றம்!

செங்சிலுவை சங்கத்தால் முன்னாள் ஜனாதிபதி மஹிந்த ராஜபக்‌ஷவின் பாரியார் ஷிரந்தி ராஜபக்‌ஷவின் சிரிலிய சமூக அமைப்புக்கு வழங்கப்பட்ட வாகனம் 2 முறை நிறம் மாற்றப்பட்டு பயன்படுத்தப்பட்டுள்ளதாக பொலிஸ் வட்டார தகவல்கள் தெரிவிக்கின்றன.

வெள்ளை நிறத்தில் வழங்கப்பட்ட வாகனம் முதலில் நீலநிறமாக மாற்றப்பட்டு பின்னர் கறுப்பு நிறமாக மாற்றப்பட்டுள்ளது.

அதன்பின்னர் ஊதா நிறமாக அதை மாற்றுவதற்கும் திட்டமிடப்பட்டிருந்தாக தெரியவருகின்றது.

மேலும் வானகத்தின் நிறத்தினை மாற்றியமை தொடர்பில் செஞ்சிலுவை சங்கத்தினருகோ அல்லது மோட்டார் வாகன திணைக்களத்துக்கோ அறிவிக்கவில்லை என்பதும் விசாரணைகளில் இருந்து தெரியவருகின்றது.

இறுதியாக செஞ்சிலுவை சங்கத்தின் முகாமையாளரின் வீட்டு வாளாகத்திலிருந்தே குறித்த வாகனம் பொலிஸாரால் கைப்பற்றப்பட்டுள்ளன.

எனினும் இதுதொடர்பில் முகாமையாளரை விசாரித்த போது சிரிலிய சமூக அமைப்பு வழங்கப்பட்ட வாகனம் மீண்டும் எப்படி தன்னுடைய வீட்டு வாளாகத்தினுள் வந்தது என்பது பற்றி தனக்கு தெரியவில்லையெனவும் வாக்குமூலம் வழங்கியுள்ளார்.

இதுதொடர்பில் சமூகநல அமைச்சிலும், ஜனாதிபதி செயலகத்திலும் பணிபுரிபவர்களிடமும் வாக்குமூலங்கள் பெறப்பட்டுள்ளன.

2011 ஆம் சிரிலிய அமைப்பின் நிகழ்ச்சியொன்றுக்கு வாகனமொன்று தேவை என்று வேண்டுகோள் முன்வைக்கப்பட்டது.

அதற்கமைவாக 0642 என்ற இலக்கத்தை உடைய குறித்த வாகனம் ஷிரந்தி ராஜபக்‌ஷவுக்கு செஞ்சிலுவை சங்கத்தால் வழங்கப்பட்டுள்ளது.

எனினும் குறித்த நிகழ்ச்சி நிறைவடைந்தவுடன் குறித்த வாகனம் யோசித ராஜபக்‌ஷவிடம் இருந்ததாகவும் அதை அவர் 2015 ஆம் ஆண்டு ஜனவரி மாதம் 20 ஆம் திகதி வரை பயன்படுத்தியுள்ளதாகவும் விசாரணைகளிலிருந்து தெரியவருகின்றது.

இதுதொடர்பில் வாக்குமூலம் அளிப்பதற்கு இன்றும் யோசித ராஜபக்‌ஷ குற்றப்புலனாய்வு திணைக்களத்திற்கு வருகைதரவுள்ளார்.

முன்னாள் றக்பி வீரர் வஸீம் தாஜீதினின் கொலைக்கு குறித்த வாகனம் பய்ன்படுத்தப்பட்டுள்ளமை தொடர்பில் பொலிஸார் சந்தேகிக்கின்றனர்.

திமுக தலைவர் கருணாநிதி மருத்துவமனையில் அனுமதி!

திமுக தலைவர் கருணாநிதி மருத்துவமனையில் அனுமதிக்கப்பட்டுள்ளார்.

மருத்துவப் பரிசோதனைக்காக சென்னை, ஆழ்வார்பேட்டையில் உள்ள காவேரி மருத்துவமனையில் கருணாநிதி அனுமதிகப்பட்டுள்ளதாக தெரிவிக்கப்படுகிறது.

கடந்த டிசம்பர் மாதத்தில் தொண்டை மற்றும் நுரையீரல் தொற்று காரணமாக காவேரி மருத்துவமனையில் சிகிச்சைபெற்றார்.

அதன் பின்னர் மருத்தவக் கண்காணிப்பில் வீட்டில் இருந்து கொண்டு சிகிச்சை பெற்றுவந்தார்.

இந்நிலையில் தி.மு.க தலைவர் கருணாநிதி மீண்டும் மருத்துவமனையில் அனுமதிக்கப்பட்டுள்ளார்.

இது குறித்து காவிரி மருத்துவனை நிர்வாகம் வெளியிட்டுள்ள அறிக்கையில்,

கருணாநிதிக்கு தொண்டையில் பொருத்தப்பட்டுள்ள உணவுக் குழாய் மாற்றப்படுகிறது.

இது சாதாரண மருத்துவ பரிசோதனை தான். மருத்துவமனையில் இருந்து இன்று மாலைக்குள் வீடு திரும்புவார் என்று தெரிவிக்கப்பட்டுள்ளது..

சட்டவிரோத மீன்பிடியில் ஈடுபட்ட 13 மீனவர்கள் கைது

சட்டவிரோத மீன்பிடியில் ஈடுபட்ட 13 உள்ளூர் மீனவர்களை இலங்கை கடற்படையினர் கைதுசெய்துள்ளனர்.

 கொக்கிளாய் மற்றும் கொக்குத்தொடுவாய் பகுதியிலுள்ள கடற்பகுதியில் சட்டவிரோத மீன்பிடியில் ஈடுபட்ட போதே குறித்த 13 மீனவர்களும் இலங்கை கடற்படையால் கைதுசெய்யப்பட்டுள்ளனர்.

 இதன்போது, 100 கிலோ கிராம் மீன், 3 பைபர் இழைப் படகுகள் மற்றும் சட்டவிரோத மீன்பிடி உபகரணங்கள் ஆகியன இலங்கை கடற்படையால் கைப்பற்றப்பட்டுள்ளன.

கைப்பற்றப்பட்ட பொருட்களுடன் 13 மீனவர்களையும் மேலதி விசாரணைக்காக முல்லைத்தீவு மாவட்ட நீரியல் வளத் திணைக்கள அதிகாரிகளிடம் இலங்கை கடற்படையினர் ஒப்படைத்துள்ளனர்.